BASQUE RESEARCH
 Euskal ikerketa, garapena eta berrikuntzaren webgunea

Laguntza

1. Zer da Basque Research?
2. Zer egiten dugu Elhuyar Fundazioan?
3. Elhuyar Fundazioa Alphagalileoko partaide
4. Zer da nazioarteko sarea?
5. Hitzarmena Ikerbasque-rekin
6. Nor izan daiteke berriemaile?
7. Nor izan daiteke kazetaria?
8. Nor izan daiteke bisitaria?
9. Zer da berri bat?
10. Nola idatzi berri bat?
11. Nola bidal dezaket nire iritzia?
12. Zein ekitaldi onartuko dira?
13. Nola idatzi ekitaldi bat?
14. Zer egin zuen berrien eta ekitaldien datuak jakiteko?
15. Nola jaso Basque Research-eko berriak nire postan?
16. Elkarrizketak
17. Zer da Tesi Saria?
18. Euskal Herriko ikerketa-taldeen direktorioa
19. Nola jarri harremanetan erakunde batekin?

1. Zer da Basque Research?

Basque Research Euskal Herrian egiten den ikerketaren web gunea da. Gune horretan, ikerketaren, garapenaren eta berrikuntzaren inguruko albisteak, agenda, elkarrizketak, kontakturako informazioa, I+G+B direktorioa eta abar aurkituko dituzu. Hain zuzen ere, informazio hori eskainiz, ikertzaileen eta gizartearen arteko zubi-lana egin nahi du Basque Research-ek.

Zein dira gure helburuak?

• Zientzia, teknologia eta berrikuntza sortzen, garatzen eta hedatzen laguntzea.
• Zientzia eta teknologiaren euskal sarea osatzen duten elementuen arteko koordinazioa bultzatzea.
• Teknologia-transferentzia bultzatzea.
• Euskal ikerketa, garapena eta berrikuntza nazioartean zabaltzea.

Basque Research Eusko Jaurlaritzaren 2001-2004ko Zientzia eta Teknologia Planaren laguntzaz jaiotako ekimena da. Plan horretan, zientzia eta teknologiaren zabalpena helburu estrategikotzat hartzen da. Hain zuzen ere, helburu horrekin sortu zuen proiektu hau Elhuyar Fundazioak. Kontuan izan behar da Elhuyar Fundazioa Zientzia, Teknologia eta Berrikuntzaren Euskal Sareko (SARETEK) berrikuntzaren arloko erakunde bitartekaria dela.

Basque Research-ek Eusko Jaurlaritzaren Industria Sailaren eta Gipuzkoako Foru Aldundiaren laguntza jaso du.

Itzuli orriaren hasierara

2. Zer egiten dugu Elhuyar Fundazioan?

Elhuyar 1972an jaio zen, zientzia eta euskara uztartzeko asmoarekin. Hasierako amets hartatik, ia 35 urte bete dituen Elhuyar Zientzia eta Teknika aldizkaria jaio zen, zientzia eta teknologiari buruzko informazio eguneratua modu erakargarri eta samurrean bildu nahi duen hilabetekaria.

2002an, Elhuyar Kultur Elkartea Elhuyar Fundazio bihurtu zen. Pauso hori eman aurretik, ordea, Elhuyar Fundazioaren jarduna nabarmen areagotu zen, eta gaur egun hainbat lan-esparru ditugu:

1. Zientzia eta teknologiari buruzko irakaskuntza-materiala euskaraz.
2. Informazio-teknologia: multimedia-produktuen ekoizpena eta softwareen itzulpena.
3. Lexikografia: hiztegiak eta entziklopediak.
4. Hizkuntza-aholkularitza: enpresetako plan estrategikoen garapena.
5. Itzulpen eta lokalizazioak: itzulpen teknikoak eta espezializatuak.
6. Zientzia-komunikazioa: sail honetan kokatzen da, hain zuzen ere, Elhuyar Zientzia eta Teknika aldizkaria, baina, denborarekin, beste hainbat produktu gehitu zaizkio, eta dibulgazio-eskaintza integrala izatera iritsi gara. Aldizkariaz gainera, zenbait irratsaio eta komunikabide idatzitan kolaborazioak ditugu, asteroko telebista-programa bat Euskal Telebistan (Teknopolis), helduentzako zientzia eta teknologiaren web gune bat —www.zientzia.net— , gazteentzako web gune bat zientziari buruz —www.zernola.net— eta euskal I+G+Bren web gune bat —www.basqueresearch.com—.

Informazio gehiago nahi izanez gero, jo ezazu gure web gunera, www.elhuyar.org

Itzuli orriaren hasierara

3. Elhuyar Fundazioa Alphagalileoko partaide

2003ko martxotik, Elhuyar Fundazioa Euskal Herriaren ordezkaria da Alphagalileo web gunean. Alphagalileo Europako ikerketaren berri ematen duen web gune bat da, eta ordezkaritza hori Basque Research-en bitartez lortu du. Hain zuzen ere, Europako ikerketa sustatu nahi du Alphagalileok, hala, Estatu Batuetatik etortzen diren ikerketa-berrien nagusitasuna orekatzeko. Proiektua Ingalaterrako British Association elkarteak gidatzen du, eta, gaur egun, Europako herrialde askotako partaideak ari dira beren herrialdeetako ordezkari-lanetan. Alphagalileoko partaideak dira: Suomen Akatemia ( Finlandia), L'Association francaise pour l'advancement des sciences (Frantzia), Jülich Forschungszentrum (Alemania), National Hellenic Foundation (Grezia), Observatorio das Ciencias e das Tecnologías (Portugal), Vetenskapsdradet (Suedia), Council for the Central Laboratory of Research Councils, The Arts and Humanities Research Board (Ingalaterra), European Science Foundation eta FECYT (Espainia).

Itzuli orriaren hasierara

4. Zer da nazioarteko sarea?

Basque Research-en nazioarteko sarean hainbat web gune biltzen dira. Hain zuzen ere, nazioarteko web gune horiekin ditugun hitzarmenen bidez, web gune horietan ere argitaratzen ditugu Basque Research-en biltzen diren berriak. Hala, euskal I+G+B mundu osoan zabaltzen dugu.

Nazioarteko web gune horien helburua ikerketa ezagutaraztea da; zientzia-dibulgazioa egiten dute. Sare horretan daude, hain zuzen ere, aurrez aipatutako Alphagalileo web gunea, Eurekalert! (Science zientzia-aldizkari ospetsua argitaratzen duen AAAS erakundearen ikerketa-berrien web gunea), Cordis Wire (ikerketaren eta garapenaren gaineko Europako Batzordeko zerbitzua), innovations-report (zientziari, industriari eta ekonomiari buruzko topalekua, Alemaniako web gunea), Madri+d (jakintzaren transferentziarako Espainiako web gunea), eta Tecnociencia.org (zientziari eta teknologiari buruzko doako egunkaria).

Itzuli orriaren hasierara

5. Hitzarmena Ikerbasque-rekin

Ikerbasque (Basque Foundation for science) Eusko Jaurlaritzak sortutako fundazio bat da. Haren helburua da atzerrian dauden euskal ikertzaileei informazioa eta laguntza ematea, beren ikerketa-ibilbidea Euskal Herrian egin dezaten. Hain zuzen ere, Ikerbasque Fundazioak Basque Research-ekin duen hitzarmenaren bidez, Basque Research-en berriak Ikerbasque web gunean argitaratzen dira, zientzialari horiei egungo euskal I+G+Bren irudia eskaintzeko.

Itzuli orriaren hasierara

6. Nor izan daiteke berriemaile?

Basque Research-ek Euskal Herrian egiten den ikerketaren eta garapenaren isla izan nahi du. Horregatik, enpresetan, ikerketa-zentroetan eta unibertsitatean egiten den ikerketaren lekuko izateko, berriemailearen irudia sortu dugu. Berriemaileak unibertsitate, ikerketa-zentro eta enpresetako ikertzaileak izan daitezke, prentsa-arduradunak, kudeatzaileak... betiere Euskal Herrikoak. Berriemaileak Basque Research-en bere berriak eta ekitaldiak txertatzeko aukera izango du; eduki horiek onartzen badira, noski.

Berriemaile izateko, nahikoa da web gunean dagoen erregistro-formularioa betetzea. Erregistroa betetzen dutenek, web gunean edukiak sartzeko aukera izateaz gainera, Basque Research-en buletina jasoko dute astero. Gainera, hilean behin, web gunearen estatistiken mezua jasoko dute.

Itzuli orriaren hasierara

7. Nor izan daiteke kazetaria?

Basque Research-eko kazetari izateko, kazetari profesionala izan behar da, edozein komunikabidetakoa. Erregistratutako kazetari horiek astero jaso dezakete Basque Research-eko berrien eta ekitaldien informazioa Basque Research-en buletinaren bidez, eta, hilero, web gunearen estatistiken berri ere jasoko dute.

Basque Research-eko kazetari izateko nahikoa da web gunean agertzen den erregistro-formularioa betetzea. Formularioan eskatzen diren datuak jasotakoan, beharrezkoa denetan, erakundearekin kontaktuan jarriko gara, kazetari horien atzean benetako profesionalak daudela ziurtatzeko. Euskal Herriko nahiz kanpoko kazetariak gustura hartuko ditugu.

Itzuli orriaren hasierara

8. Nor izan daiteke bisitaria?

Berriemailea edo kazetaria ez den edonor izan daiteke bisitaria, hau da; ikertzaileak, kudeatzaileak, enpresariak, norbanakoak.... Basque Research-en agertzen den informazioa interesatzen zaion edonor izan daiteke bisitaria eta, hain zuzen ere, asteko berrien eta ekitaldien laburpena jasotzeko egiten dute erregistroa.

Itzuli orriaren hasierara

9. Zer da berri bat?

Berria ikerketaren muina azaltzen duen artikulua da. Berri guztiek oinarrizko galdera hauei erantzun behar diete: Zein da berriaren muina? Nork egin du ikerketa? Non egin da ikerketa? Zergatik da interesgarria?

Saiatu zure berria ulerterraza egiten, eta puntu garrantzitsuenetik abiatu. Garrantzitsuagoa da berria ongi sintetizatua egotea zehaztasun zientifikoetan gehiegi murgiltzea baino.

Berritzat onartuko dira:

• Zientzia eta teknologiaren alorreko ikerketa oro (oinarrizkoa eta aplikatua).
• Ikerketa egiteko erakundeen arteko hitzarmenak, akordioak...
• Ikerketari emandako sariak
• Produktu berrien merkaturatzea, betiere produktuaren garapenak barne-ikerketa eragin badu.
• Patenteak.

Ez dira onartuko:

• Datu ekonomikoak soilik azaltzen dituzten berriak.
• Produktu berriak promozionatzeko berriak.
• Euskal Herritik kanpo egindako ikerketak. Kanpoko erakunderen batek egindako ikerketa kontuan hartuko da, baldin eta euskal erakunderen batek parte hartu badu.
• Zientzia eta teknologiarekin zerikusirik ez dutenak.

Itzuli orriaren hasierara

10. Nola idatzi berri bat?

Berria idazteko, Basque Research web guneko formularioa osatu behar da, Berria sartu aukeran. Formulario horretan, nahitaezko zenbait atal aurkituko dituzu; horiek osaturik ez badaude, ez da onartuko berria.

Berria onartua dagoenean aldaketaren bat egiteko, Berria aldatu aukeran sartu behar da. Gogoratu zure berria bidaltzeko eta aldatzeko berriemaile erregistratua izan behar duzula.

Izenburua

Berriaren deskribapen zehatza egingo duen esaldia da. Ikerketaren informaziorik ez badu, ez da deigarria izango, eta kazetariek ez dute plazaratuko.

Testua

Testu nagusiak zehatza izan behar du, eta hizkuntza teknikoaren akronimoak saihestu behar ditu. Akronimoren baten erabilera ezinbestekoa denean, azalpen labur bat eman behar da ondoren. Esaldi bakoitzeko ideia bat azaldu, eta garrantzitsuena hasieran jarri, xehetasunak azkenerako utzita.

Laburpena

Ziurta ezazu laburpenak zure berria jasotzen duela, eta azaldu zergatik den garrantzitsua berri hori. Testua erraz ulertzeko moduan laburtu; hala, jendearen arreta zureganatuko duzu. Laburpena da kazetari askok asteroko buletinean jasoko duten bakarra, eta horrek bideratu behar ditu zure berrira.

Oharrak

Oharretan, beharrezko jotzen den edozein datu jar daiteke, hala nola zientzialarien datuak edo gaiarekin erlazioa duen aurreko ikerketaren baten erreferentzia.

Interneteko helbidea

Datu horien artean Interneteko helbidea ere jar daiteke, datu gehiago nahi dituenarentzat. Interneteko helbidea ikerketa gauzatu den erakundearen orri nagusia edo informazio osagarria eskuratzeko lotura izan daiteke.

Gaiak

Berriaren gaia edo zientziako atala azaltzen du, zehazteko balio du.

Informazio osagarria

Berriarekin batera, informazio osagarria bidaltzeko aukera duzu (argazkiak, bideoak, audio-artxiboak, dokumentuak). Informazio osagarri hori oso baliagarria izango da, bai kazetarientzat eta bai beste ikertzaileentzat. Hala, zure berriak oihartzun handiagoa izatea lortuko duzu.

Hizkuntzak

Zure berria hiru hizkuntzatan agertuko da: euskara, gaztelania eta ingelesa. Itzulpenak egin artean berria ez da kaleratuko, hau da, guk jaso eta bi egun pasatu arte gutxienez.

Editorea

Berriak ez dira automatikoki kaleratuko. Lehenik, edukiak egokiak direla eta Basque Research-eko irizpideak betetzen dituztela ziurtatuko da.

Berriemailearen datuak

Berriarekin batera, berriemailearen datuak bistaratuko dira. Datu horiek kazetarientzat eta gainerako berriemaileentzat harremanetarako pertsona zehazteko balio dute. Pertsona horrek prest egon behar du edozein zalantzaren aurrean erantzuteko. Kontuan izan behar da Basque Research-en erregistratutako kazetarien % 90 atzerritarrak direla, eta oso ohikoa dela haiengandik berrien inguruko informazio-eskaerak jasotzea.

Itzuli orriaren hasierara

11. Nola bidal dezaket nire iritzia?

Basque Research-en argitaratutako ikerketa baten gainean zure iritzia bidali nahi baduzu, jo ezazu Zure iruzkinak bidali aukerara, irakurtzen ari zaren albistean edo berrian bertan. Zure parte-hartzea garrantzitsua da guretzat, eta, horregatik, Basque Research-en argitaratzen ditugun berrien inguruan zure iritziak, kritikak edo iruzkinak bidaltzeko aukera izango duzu hemendik aurrera. Iruzkin horiek ez dira itzuliko, zuk bidalitako hizkuntzan argitaratuko ditugu. Iruzkin horiek lagungarri izan daitezke ikerketa egin duenarentzat, baita kazetarientzat eta beste erabiltzaileentzat ere.

Itzuli orriaren hasierara

12. Zein ekitaldi onartuko dira?

Basque Research web guneko ekitaldiek ikerketa, berrikuntza eta garapenarekin erlazionatuta egon behar dute. Kasu honetan, ordea, Euskal Herritik kanpo egindako ekitaldiak ere onartuko dira, betiere ikusten badugu zientzia eta teknologiarekin lotuta daudela.

Itzuli orriaren hasierara

13. Nola idatzi ekitaldi bat?

Izenburua

Izenburuan, ekitaldiaren izen ofizialak agertu behar du. Luzeegia bada, laburtu egin daiteke. Izenburua hizkuntza batean baino gehiagotan baldin badago, horietako edozeinetan eman daiteke.

Ekitaldiaren deskribapena

Ekitaldiaren deskribapena azalpena da, baina paragrafo bakarrekoa izan behar du. Paragrafo horretan, ekitaldiaren xedea eta deialdiaren nondik-norakoak azaldu behar dira, baita nori zuzendua dagoen ere. Inskripzio-kuotarik dagoen edo ez ere adierazi behar da, eta baita izen-ematea nola egin behar den ere.

Ekitaldiaren programa eta bestelako datuak informazio osagarrian argitaratuko dira. Bestelako informaziorako, ekitaldiak izango duen Interneteko estekara jo beharko dute erabiltzaileek.

Kontaktu-pertsonaren datuak

Harremanetarako pertsona baten datuak behar dira ekitaldi guztietan. Izen-abizenez gainera, telefonoa eta helbide elektronikoa zehaztu behar dira, gutxienez. Edozein zalantza izanez gero, edo izen-ematea egin nahi izanez gero, pertsona hori izango da harremanetarako kontaktua.

Non eta noiz den ekitaldia

Ekitaldia non eta noiz egingo den garbi azaldu behar da. Horretarako, egoitzaren helbide osoa eman daiteke, edo ekitaldia egingo den aretoaren izena eta hiria zehaztu: adibidez, Euskalduna Jauregia, Bilbo. Gogoratu herriaren izena beti jarri behar dela. Zein egunetan hasi eta bukatzen den ere jarri behar da, formularioan dagokion tokian datak aukeratuz.

Itzuli orriaren hasierara

14. Zer egin zuen berrien eta ekitaldien datuak jakiteko?

Bisita-kopuruen atalean, zuk bidalitako berriek eta ekitaldiek zenbat bisita izan dituzten jakiteko aukera izango duzu. Gogoratu horretarako erabiltzaile-izena eta pasahitza sartu beharko dituzula goiburuan, hau da, berriemailea zarela ziurtatu behar duzu.

Itzuli orriaren hasierara

15. Nola jaso Basque Research-eko berriak nire postan?

Basque Research-eko berriak eta ekitaldiak posta bidez jasotzeko, erabiltzaile erregistratua izan behar duzu. Horretarako, berriemaileari, kazetariari edo bisitariari dagokion erregistroa bete behar duzu.

Itzuli orriaren hasierara

16. Elkarrizketak

Elkarrizketen atalean, Elhuyar Zientzia eta Teknika aldizkarian argitaratzen diren elkarrizketak irakurtzeko aukera izango duzu. Horrez gainera, zuretzat interesgarria izan daitekeen elkarrizketaren bat proposatzeko bidea zabaldu dugu; zer ikertzaileri eta zergatik gustatuko litzaizukeen elkarrizketa egitea azaldu behar duzu.

Itzuli orriaren hasierara

17. Zer da Tesi Saria?

Basque Research-en Tesi Saria 2003an sortu zen, unibertsitateetan egiten diren doktore-tesiak ezagutarazteko. Harrezkero, doktore-tesia amaitu berri duten hainbat ikertzaileren dibulgazio-lanak aurkeztu dira sarietara urtero, eta handik gizarteratzeko bidea egiten dute. Deialdiaren bidez, ikertzaile horien lanak saritu eta bai Euskal Herrian bai atzerrian zabaltzeko bidea ematen da.

Itzuli orriaren hasierara

18. Euskal Herriko ikerketa-taldeen direktorioa

I+G+B direktorioa ikerketa, garapena eta berrikuntzari buruzko euskal enpresen, ikerketa-zentroen eta unibertsitateko sailen direktorioa da. Direktorio horretan, ikerketa-taldeen berri aurkituko duzu, eta haiek dituzten ikerketa-lerroen informazioa eskuratuko duzu.

Bilaketa aurreratuaren bidez, aurkitu nahi duzun erakundearen, ikerketa-lerroaren edo ikertzaile arduradunaren informazioa topatu ahalko duzu direktorioko fitxen artean.

Itzuli orriaren hasierara

19. Nola jarri harremanetan erakunde batekin?

Enpresa, unibertsitate edo zentro teknologiko batekin harremanetan jartzeko pertsona baten bila bazabiltza, kontaktuen liburuan aurkituko dituzu gure berriemaileak. Liburu horretan, prentsa-arduradunak, komunikazio- eta marketin-sailetako kideak, ikertzaileak eta sail-arduradunak daude, besteak beste.

Itzuli orriaren hasierara